Dorëheqja/largimi nga puna paraqet „akt të njëanshëm “ të punëdhënësit apo të punëtorit, me të cilin anulohet kontrata e punës. Kontratën e punës mund ta anulojë punëtori, por edhe punëdhënësi. Punëtori mund ta anulojë kontratën e punës nëse me shkrim deklaron se dëshiron ta anulojë kontratën e punës. Për atë (si ana„më e dobët“ në marrëdhënien e punës) nuk kërkohet arsyetimi për arsyet për të cilat dëshiron ta anulojë kontratën e punës. Në të drejtën e punës dhe në jetën e përditshme, me rëndësi të veçantë është anulimi i kontratës së punës nga ana e punëdhënësit dhe si pasojë e kësaj, mbrojtja e punëtorëve nga largimi joligjor (i pabazuar) nga puna.

 Mbrojtja e punëtorëve nga largimi joligjor nga puna varet nga përmbushja e dy supozimeve kyçe, të cilat janë: ekzistimi apo mosekzistimi i shkakut të arsyetuar për anulim të kontratës së punës nga ana e punëdhënësit dhe përmbushje apo mospërmbushje të veprimeve të caktuara paraprake. Nëse në rastin konkret nuk ekziston shkak i arsyetuar për anulim të kontratës së punës dhe/ose nuk janë kryer veprimet e detyrueshme që i paraprijnë anulimit të kontratës, atëherë ndërprerja e kontratës mund të llogaritet joligjore dhe  duhet të anulohet. Përkundrazi, nëse në rastin konkret ekziston shkak i arsyetuar për anulim kontrate dhe janë kryer të gjitha veprimet e detyrueshme që i  paraprijnë anulimit, atëherë anulimi i kontratës është ligjor dhe i lejuar.

Shkaqe të arsyetuara për anulim të kontratës së punës:

Shkaqe personale (kur punëtori për shkak të sjelljes së vet, mungesës së dijes apo mundësive ose mospërmbushjes së kushteve të posaçme të përcaktuara me ligj nuk është i aftë ti kryejë obligimet e kontratës apo marrëdhënies së punës);

Shkak i fajit (kur punëtori i thyen obligimet e kontratës apo obligime tjera të marrëdhënies së punës)  dhe

Shkaqe afariste (kur do të përfundojë nevoja e kryerjes së ndonjë pune të caktuar nën kushtet e përcaktuara në kontratën e punës për shkaqe ekonomike, organizative, teknologjike, strukturore ose shkaqe të ngjajshme nga ana e punëdhënësit).

Ligji për Marrëdhënie të Punës i „lejon“ shkaqet e arsyetuara, por i „ndalon “ shkaqet e paarsyetuara për anulim të kontratës së punës. Shkaqet e paarsyetuara për anulimin e kontratës së punës janë: anëtarësim i punëtorit në sindikatë ose pjesëmarrje në aktivitete sindikaliste në përputhje me ligjin dhe Marrëveshjen Kolektive; paditje ose pjesëmarrje në procedurë kundër punëdhënësit; mungesë e lejuar nga puna për shkak të sëmundjes ose lëndimeve, shtatzani, lindje dhe prindërim, përkujdesje për anëtar të familjes dhe pushim prindëror i papaguar; shfrytëzim i mungesës së lejuar nga puna dhe pushimi vjetor; kryerja e shërbimit ushtarak ose ushtrim ushtarak dhe raste tjera kur pezullohet kontrata e punës dhe janë në përputhje me Ligjin.

Veprime të detyrueshme që i paraprijnë anulimit :

• Në rastin e shkaqeve personale nga ana e punëtorit (sigurimi i kushteve të duhura për punë, dhënia e udhëzimeve adekuate, drejtime dhe paralajmërim me shkrim nga punëdhënësi, me të cilën punëdhënësi i tregon punëtorit se nuk është i kënaqur me mënyrën e punës së tij duke i dhënë edhe afat që nuk mund të jetë më i shkurtë se 15 ditë me qëllim që ta përmirësojë punën e tij);
• Në rastin e shkaqeve të fajit që supozojnë lëndime më të lehta të rendit të punës dhe diciplinës ose obligimeve të punës nga ana e punëtorit dhe që mund të sanksionohen me anulim të kontratës me afat të informimit (paralajmërim me shkrim me të cilin punëdhënësi e paralajmëron punëtorin për mundësinë e anulimit të kontratës në rast të thyerjes së mëtutjeshme të obligimeve të kontratës së punës ose dhënia e dënimit në të holla);
• Në rastin e shkaqeve afariste (përcaktimi i ekzistimit të mundësive te punëdhënësi për vazhdim të marrëdhënies së punës së punëtorit para anulimit të kontratës së punës, siç janë: oferta për punësim te punëdhënës tjetër pa shpallje, me marrjen e punëtorit dhe nënshkrimin e kontratës së punës me të për punë adekuate me kualifikimin e punëtorit; sigurim të aftësimit profesional, mbikualifikim apo rikualifikim ose ofrim i kontratës së re të punës);
• Përcaktimi i afatit të njoftimit (në rastet kur shkaqet për largimin nga puna janë të tilla që është e detyrueshme dhënia e afatit të njoftimit) ose kompensimi me të holla në vend të afatit të njoftimit (kur për kompensim të tillë ka marrëveshje).Ligji për Marrëdhëniet e Punës i përcakton kohëzgjatjen e afateve minimale të njoftimit. Nëse punëdhënësi e anulon kontratën e punës të ndonjë punëtori të caktuar ose të një numri të vogël të punëtorëve, afati i njoftimit është një muaj. Afati i njoftimit zgjat dy muaj në rastin kur anulohet marrëdhënia e punës së më shumë se 150 punëtorëve ose 5 % e numrit të përgjithshëm të punëtorëve te punëdhënësi;
• Pagesë për përcjellje nga puna, e cila paraqet kompensim në të holla i punëtorit vetëm një herë në rastin e largimit nga puna për shkaqe afariste (teknologjike, ekonomike, organizative dhe ndryshime të ngjajshme). Sasia e kompensimit në të holla mund të jetë nga një pagë deri në shtatë neto paga dhe ky kompensim përcaktohet në varësi të viteve të kaluara në marrëdhënie të punës te i njëjti punëdhënës (duke e përfshirë edhe punëdhënësin paraprak, të cilit për shkak të ndryshimit të statusit, trashëgimtar juridik është punëdhënësi i fundit).

Punëtori i cili mendon se anulimi i kontratës së tij të punës është joligjor (jo i lejuar) ka të drejtë të nisë procedurë për anulimin e vendimit për largim nga puna dhe të kërkojë të kthehet në vendin e punës dhe/ose ta realizojë të drejtën e kompensimit në të holla prej punëdhënësit. Mbrojtjen e këtillë të të drejtave të veta punëtori e realizon në procedurë që përfshin dy instanca ( së pari para punëdhënësit, pastaj para gjykatës kompetente), në përputhje me aktet që zbatohen (para së gjithash, Ligjit për Marrëdhënie të Punës dhe Ligji për Procedurë Gjyqësore).